Psalms 51

Kari Kaem noko memek siwurokko ngatangaruwoso ko den

(Devit ko wur bo)

(Devit Yuraia ko imet Batsiba tam, se profet Natan Devit kote namaram ale ko maonam. Se Devit ko memek beteram mu ko gomang ikup biya se den imi batogam.)

1O Kaem, ni gemang tua munan mu pempem aniso se

ani ago ko neman batagukko.

Nika gemang bataga mu biyala aniso ware ko se, aninga memek am siwu waruko.

2Ni aninga memek ware siwu anu waru ale angamang nikim tuiko.

3Ani memek beterem mu ani ko ikisam,

se memek mu pempem angamin te aniso.

4Ani ni kema te memek imi beterem,

munan ni ikisam mu memek ware ani beterem.

Se ni aga memek ko aga manorsam mu ni diram balsam.

Ni den te aga atumusam mu ni diram betesam.

5Ani ayam tuagu ningi la memek karogo bagakasam,

se aking memek karogo la ayam tuagu te aratem.

6Ni ani angamang ningi nunguning bagirikko ko kuesam,

mu ko nika ikia yawara angamin ningi tugum se te yawarakala bagirikko.

7Ni karur aninga angamang tuagu te aniso ware anup se kapurukko,

aninga memek siwur se angamang tuagu nikinang pagukko.

8Ni aninga angimik sail iruwurem ale asokel menawurem,

bare aitak ni aninga sangaru se aking amilmil te bagirikko.

9Ni aninga memek singir la siwu waru ale aking udagi me ko ikia toko.

10O Kaem, ni aninga angamang tuagu karur menawur ale

marak sokel iru ware aisu se ni kewom la karikko.

11Ni aninga karo ale awar me aga bitarko,

nika Bur yawara aningate aniso mu me kutuwu toko.

12Tom ni aninga sangaru taem mu ani amilmil biya, se gemang aisu se aking uwutata amilmilarikko.

Aga sangaru se kiring karo tuekko.

13Mu te ani memek betera kari alo mu nika munan den nunga kausek, se giris palagomon kiring karo tumonko.

14O Kaem, gue agiting te aniso imi siwur se

ani amilmil te nika munan diram mu ko nunga manik se ikimonko.

15Kari Biya, sokel ais se sail karogo den balu se nika nip patawirikko.

16Ani sipsip meme te tama kisekko, ware ni tama mu mesam,

ale mel tama te kai sapasan mu ni me ko amilmilasam.

17Se Kari Biya, ani aga tama kisisam mu iwita,

ani giris palagem ale nika bowa ningi bagasam.

Se ani ikisam mu ni tama imi ni me merko.

18Se Kari Biya, ni wonong Saion gemang tui ale sangaruko,

ale Jerusalem ko kar parasaram mu bangaruko.

19Mu te nuna nika tama yawara bita kisimonko,

ale mel alta te kai sapasan mu karogo bita kisimon se ko amilmilerko.

Se bulmakau kari mu nunga momon ale nika alta te nunga awumonko.